Covid-19 Test kit man tlawm ber siam chhuak

Indian Institute of Technology (IIT) Delhi hmuhchhuah, khawvela Covid-19 test kit man tlawm ber 'Corosure' chu Nilaini khan Human Resource Development (HRD) minister Ramesh Pokhriyal chuan a tlanzarh.

He test kit hi RT-PCR based Covid-19 diagnostic kit a ni a, a man zat hi Rs 399 a ni. Indian Council of Medical Research (ICMR)-in a pawm, Corosure hi RNA isolation leh laboratory charge telh a nih hnuah a man zat chu Rs 650 a ni. IIT Delhi-a Kusuma School of Biological Sciences chuan he thil hi an siam chhuak a, test kit dangah chuan an test dan kalphung hi probe-based a ni a, test kit hmuhchhuah tharah erawh probe-free method a ni thung tih IIT Delhi chuan a tarlang. 

Tlangzarh inkhawmah minister Ramesh chuan he test kit hi kan ramin a mamawh mek a nih thu sawiin, he thil hian Covid-19 hri leng thunun tumna kawngah a puih theih a rin thu leh test kit dang zawng zawng aia tlawm a nih thu a sawi a, sorkar laipui thil tum "Make In India" tihhlawhtlinna pakhat a nih thu a sawi bawk.  

Test kit thar hi sorkar pawm laboratory-ah hman theihin a awm dawn a, he test kit hmanga test neite chuan darkar thum chhung lekin an result an hre hman ṭhin dawn a ni. RT-PCR (Reverse transcription polymerase chain reaction) test hi tun dinhmuna India-a Covid-19 hri an kai nge kai loh tih test-na atana rin ber a ni mek a, RT-PCR-a pakhat test nan hian Rs 2,200 leh 3,000 vel sen a ngai ṭhin a ni.