Pilot-a'n disqualification notice pek a nih chungchang Rajasthan High Court-ah a khing let

Rajasthan deputy chief minister hlui, Sachin Pilot chuan Assembly Speaker CP Joshi-a'n ban a nih chungchanga hriattirna a pek chu Rajasthan High Court-ah a khing let. Sachin-a khin letna hi nimin tlai khan ngaihtuah a ni a, mahse vawiina ngaihtuah chhunzawm turin an dah a ni.  

Speaker Joshi hian Nilaini khan Pilot leh a thlawptu Congress MLA 18-te chu Congress Legislative Party meeting ṭum hnihah an tel loh avangin disqualification notice a pe a ni. Pilot chuan disqualification notice pek an nih chungchangah hian dan behchhan nei lo, chief minister Ashok Ghelot thupek anga Speaker-in a  tih mai nia a ngaih avangin court-ah hian a khing let nia sawi a ni.

Chief minister Ashok Gehlot laka a hel hnuah Sachin Pilot  hian BJP a zawm dawn nia sawi thawm a tam hman hle a, mahse amah ngei pawhin BJP a zawm loh thu leh, Congress member a la nih reng thu a sawi. Hemi hnu hian union minister Gajendra Singh Sekhawat pawhin BJP leh Sachin Pilot hi an inbe lo tih a sawi ve leh bawk. 

Sekhawat chuan mi tupawhin an party an zawm duh a nih chuan lawm takin an pawm reng a ni tih a sawi a, hemi rual hian Sachin Pilot hi Congress sorkar laka a hel hnuah an party hruaitute nen an inbepawp lo tih a sawi. CM Gehlot zawk chaun Pilot chu Congress aṭanga paihchhuah tumin a bei zawk a ni tiin, Gehlot kaihhruai sorkar a tlak hun chu mipuite chuan an ngaichang reng a ni, a ti.