Police-te silai hmehpuahah loneitu 5 an thi

Madhya Pradesh-a Mandsaur khuaah loneitu nawrh huaihawt mek zing­a panga chu Thawhlehni khan police-te silai hmehpuahah an thi.

National Farm Workers’ Union hruaitu Gajendra Tokas chuan police-te hian loneitu pungkhawmte hnawhdarh nan silai an hmetpuak a, loneitute chuan ralthuam engmah an keng ve lo niin a sawi. Hetih­lai hian state home minister Bhupendra Singh chuan police-te hian loneitute an kap lo a, mipui pungkhawm zinga ṭhenkhatin silai hi an hmetpuak zawk niin a sawi thung.

Minister chuan he thil thleng chungchang hi chhui chiang turin thupek a tichhuak nghal a ni.

Loneitute hian kar hmasa aṭang khan Ma­dhya Pradesh leh Maharashtra state khawthlang lamah nawrh an huaihawt a, an loan leiba chu ngaihdam sak tur leh, an thlai thar chhuah zawrhna mante siamṭhat sak turin sorkar an phut a ni. Nawrh an huaihawt­na hmunah hian an thlai tharte paihkhawmin, bawnghnute tam tham tak an leihbaw bawk. Loneitute chuan an thlai thar hralhna lam sorkarin a ngaihtuahpui loh avangin hmun tam takah man tlawm te tea hralh a ngai a, purunsen pawh kg khat cheng khat tea hralh a ngai a, tomato leh alu te pawh man tlawm tea hralh a ngai a, sum tak tak an hloh phah tih an sawi.

Thawhṭanni leh Thawh­lehni zing khan MP-a nawrh huaihawtte chuan motor an hal a, tharum thawhna pawh a thleng bawk.

State pahnih chief minister-te chuan loneitute thil phut hi ngaihtuah sak an tiam a, an nawrh titawp turin ngen mah se hmun ṭhenkhatah chuan nawrh hi huaihawt chhunzawm zel ala ni. Loneitute chuan Thawhlehni-a silai hmehpuahna hmun hi tlawh tur­in Chief Minister Shivraj Singh Chouhan an phut a, CM-in a tlawh hma chuan mi panga-te ruang hi halral a ni dawn lo tih an sawi.

Maharashtra Chief Minister Devendra Fadnavis chuan October 31 hmain loneitute loan ba chu ngaihdam a nih tur thu a sawi a, loneitut nuai 32 te leiba ngaihdam nan hian sorkar chuan cheng vaibelchhe 30,500 vel a sen a ngai dawn a ni.

BJP sorkarna state pahnih, Madhya Pradesh leh Maharashtra-a thil thleng vang hian Prime Minister Narendra Modi chuan nimin khan emergency meeting a ko nghal. Congress vice president Rahul Gandhi chuan vawiin hian Mandsaur khua hi tlawh a tum.