Parliament Monsoon Session : AAP MP Sanjay Singh hrem ve leh, MP 24 hrem an ni tawh

Aam Aadmi Party (AAP) member Sanjay Singh chu Parliament chhunga a chet dan mawi lo avangin tun kar chhung session-a tel thei lo turin nimin khan hrem a ni ve leh. Thawṭannia neih ṭan, Parliament Monsoon Session-ah hian eptu party MP 24 hrem an ni tawh.

AAP MP Singh hian Thawhlehnia rorel inkhawmah Gujarat-a Botad disrict-a zu chhe in vanga mi 28 thihna thleng chungchang sawiho phutin an au a, chairman-in an ṭhutna hmun pan tura a hrilh chu lungawi loin a paper ken chu pawthlerin chairman lamah a vawm a ni. Hei vang hian nimin aṭang khan hrem a ni. MP 24 hrem zinga 20 hi Rajya Sabha member an ni. Lok Sabha-a Congess MP pali chu tun session chhung zawng, August 12 thleng rorel inkhawma tel thei lo tura hrem an ni.

Tun ṭum hi session khat chhunga Rajya Sabha-a member hrem an tam ber ṭum niin, nikum November thlaa Winter session neihah khan, eptu MP-te chu a hma Monsoon session-a House chhunga buaina an siam avangin hrem an lo ni tawh bawk.

July 18 aṭanga neih ṭan, Parliament monsoon session neih mekah eptu party-ten ram chhunga thil man sang chak lutuk leh GST rate tihsan chungchangte sawiho phutin rorel inkhawm an aubuai fo a, hei vang hian Rajya Sabha leh Lok Sabha pawh rorel mumal thei loin tihtawp a ni fo a ni.

Nimina Rajya Sabha rorel inkhawm pawh chhun chawlh neih hmain eptuten MP hrem leh thil dangte avanga sorkar laka lungawi lohna lantira an aubuai avangin inkhawm hi ṭum thum tihtawp lailawk a ni. Lok Sabha pawh chhun dar 12 thleng tihtawp a ni bawk.

Eptu MP hremten lungawi lohna lantir zel tum
Rajya Sabha-a eptu MP hremte chuan nimin khan Parliament complex-a Mahatma Gandhi lim bulah lungawi lohna an lantir a, Zirtawpni thleng khian lungawi lohna hi lantir an tum tih an sawi.

MP hrem zinga pakhat, TMC MP Sushmita Dev chuan hrem an nih dan chu a dik lo tih sawiin, BJP kaihhruai sorkar laipui chuan ram chhung thil man sang zel chungchang sawifel ngaihna a hre lo tih a chiang hle a ni, a ti. "Finance Minister Nirmathala Sitharaman a damsam lo a nih pawhin, Prime Minister Narendra Modi chuan eptute zawhna hi a chhang thei reng a ni," tiin Rajya Sabha-a leader BJP MP Piyush Goyal-a'n Finance Minister a dam ṭhat a, Parliament session-a a tel peih hunah thil man sang chungchang sawiho chu sorkarin a inhuam reng nia a sawi chu a chhang let bawk.