ED-in darkar 12 chhung Sonia Gandhi thu an zawt

Enforcement Directorate (ED) chuan Congress party president Sonia Gandhi chu a ni thumna atan National Herald case kaihhnawihah thu an zawtfiah leh. Ni thum chhung hian darkar 12 thu zawtin, zawhna 100 an zawt a ni.

Kum 75 mi, Sonia Gandhi hi nimin khan darkar thum chhung thu zawh a ni a, a hma ni hniha thu an zawh nen, ED hian darkar 12 chhung zawhna hi an zawt. ED official-te chuan Gandhi hian an zawhnate ṭha takin, rang taka a chhan ṭhin thu an sawi.

Sonia fapa, Rahul Gandhi pawh ED hian hemi case vekah hian ni nga chhung zawhna an lo zawt tawh a, zawhna 150 vel an zawt a ni.

ED-in ni thum zawhna an zawh chhung hian Sonia Gandhi hi a fanu, Priyanka Gandhi Vadra chuan a ṭawiawm zel a, Sonia Gandhi hi Covid-19 hri kai a dam hlim a nih avangin medical staff-te pawh duty tir an ni bawk.