MP Police-te’n Rahul Gandhi an man

Police-te silai hmehpuah avanga loneitu mi panga an thihna hmun, Madhya Pradesh-a Mandsaur district chu nimin khan Congress vice president Rahul Gandhi-a’n tlawh a tum a, mahse police-te’n rem ti loin an man.

Rahul Gandhi hi loneitu thi chhung­te hmuh leh hnem tuma kal a ni a, mahse nawrh huaihawt mek loneitute leh police-te inkara buaina chhuahna, Mandsaur district-ah hian dan leh thupek kenkawh a nih theih nan punkhawm khapna thupek siam a ni. Police-te chuan Congress hruaitu hian thupek a palzut avangin Neemuch-ah man a nih thu an sawi a,mipui chim theih lohna hmunah hruai nghalin Section 151 hnuaiah thubuai siamsak a ni.

Rahul Gandhi bakah Congress hruaitu dang Digvijay Sigh, Kamal Nath Singh, Sharad Yadav leh midang­te pawh Neemuch an luh phalsak a ni lo a, Rajasthan Congress unit chief Sachin Pilot pawh man a ni bawk.

Rahul Gandhi chuan, “Loneitute thah an ni a, kal ngei ka duh a ni. PM chuan mi hausa zawk te tan loan ngaihdamna a siamsak theih laiin, loneitute loan ba chu a ngaidam ve thei lo a ni”, a ti. Man a nih chhan chu a hriat loh thu leh, engmah an sawifiah loh thu a sawi bawk.

Madhya Pradesh Home Minister Bhupendra Singh chuan loneitu mi panga-te chu police silai hmehpuaha thi an ni tih sorkar pawhin a pawm thu a sawi. He thil thleng vang hian sorkar chuan Mandsaur District Collector leh Superintendent fo Police-te pawh a sawnchhuak nghal tih a sawi.

Hetih lai hian Mandsaur-a nawrh huaihawt vanga tharum thawhna thleng kaihhnawihah mi 62 man an ni tawh thu SP OP Tripathi chuan a sawi. Mandsaur-ah hian buaina punlun zel tur veng turin Rapid Action Force (RAF) dah belh an ni bawk.