Halpuah siamna factory-a thil puakah mi 23 thi
Madhya Pradesh, Balaghat-a halpuah siamna factory-a thil puak avangin mi 23 an thi.
Nilaini tlaia factory-a thil puak vang hian kangmei a chhuak zui a, kangṭhelhtuten darkar hnih hnu velah an ṭhelh mit thei a ni. Superintendent of police Amit Sanghi chuan chhiatna thlenna hmun hi Khari khuaa Barsa factory a nih thu a sawi a, tlai dar 3 vela thleng niin a hmunah hian police leh district official-te an kal nghal thu a sawi.
Chief Minister Shivraj Singh Chouhan chaun factory-a chhiatna thlenga thi chhungte chu cheg nuai hnih ṭheuh pek an nih tur thu a sawi a, hliam tuarte enkawlna pawh state sorkarin a tumsak dawn tih a sawi.
India rama halpuah leh puak thei thil dang siamna factory-ahte hian sorkarin inkaihhruaina dan a siamte an zawm ṭha tawk loh vangin thil puak leh kangmei a chhuak fo a ni. Factory-a chhiatna thleng rapthlak ber chu kum 2012 September thlaa Sivakasi, Tamil Nadu-a thil puak na tak thleng kha a ni a, he chhiatna thleng vang hian mi 40 thiin, midang 70 chuangin hliam an tuar a, factory hian licence pawh a nei lo nia sawi a ni.