Kerala-in bawng talh khap vangin special session nei
Sorkar laipuiin talh atana bawng zawrh leh lei khapna thupek a tihchhuah chu Kerala sorkar chuan na takin a lo sawisel tawh a, hemi chungchang sawiho hian special assembly session a nei.
Session ṭan hma hian MLA-te hian assembly canteen-ah bawngsa kan an ei a ni. Special session-ah hian Chief Minister Pinarayi Vijayan chuan resolution pu lutin, bawng talh khap hian an state chu a nghawng na dawn hle tih sawiin, mi nuai nga velin hna an chan phah dawn a ni, a ti. Kerala-ah hian kumtin sa ton nuai 2.5, cheng vaibelchhe 6,552 vel hralh a ni ṭhin a, sa thawnchhuah chu mi tam takin eizawnna atan an hmang a ni. Kerala CM Vijayan chuan sorkar laipui thupek hi na taka sawiselin an khin let tur thu a sawi tawh a ni. Vijayan hian state hrang hrang chief minister-te hnenah lehkha thawnin, bawng talh khapna thupek tihchhuah dodal turin a lo ngen tawh bawk.
Sorkar laipuiin bawng talh khapna thupek a siam hi state tam takin an sawisel a, an zawm loh tur thute an sawi. Hmun ṭhenkhatah chuan sorkar thupek duh lohna lantirin bawngsa festival-te pawh buatsaih a ni.
Karnataka, Kerala leh Tripura sorkar chuan sorkar laipui thupek hi an zawm loh tur thu an sawi tawh a, West Bengal Chief Minister Mamata Banerjee pawhin state sorkarin thupek hran a tichhuak lo a nih chuan sorkar laipui thupek hi zawm lo turin state mipuite a hrilh ve bawk.