Congress-in Rahul Gandhi man an sawisel
Congress Party chuan an party vice president Rahul Gandhi-a’n Madhya Pradesh-a man a tawk chu sawiselin, he thil hi a democracy kalphung lo hle tih an sawi.
Congress hruaitu leh union minister hlui AK Antony chuan Gandhi leh Congress hruaitu dangte hren an nih danah, Madhya Pradesh sorkar chuan fundamental rights a palzut a ni, a ti.
AK Antony chuan, “Madhya Pradesh sorkarin Mandsaur tlawh phal loa Rahul Gandhi alo dang hi a democracy kalphung lo hle a ni. Rahul Gandhi hian India khua leh tui a nih angin Madhya Pradesh tlawh a, harsatna tawk mek loneitute a thlawpna lantir tur leh nunna chan chhungte a tawrhpuina lantir turin dikna a nei a ni”, a ti.
Madhya Pradesh loneituten nawrh an huaihawt mekah sorkar laipui chu inrawlh thuai turin Antony chuan a ngen a, boruak chhe zawk a thlen a hlauhthawnawm thu sawiin hei hian rampumah nghawng ṭha lo tak a neih theih tur thu a sawi.
Rahul Gandi hian Ningani khan police-te silai hmehpuaha loneitu panga thihna thlenna hmun tlawh a tum a, mahse police-te chuan Neemuch district-ah lo manin Indian Penal Code (IPC) section 151 hnuaiah thubuai an lo siamsak a ni. Mahse a hnuah bail-a chhuah phalsak leh nghal niin, Mandsaur-a loneitu thi chhungte chu hmuin a kawm zui ta tho a ni.
Hetih lai hian BJP chuan Rahul Gandhi-a’n Mandsaur a tlawh hi intihlar tumna hmanrua niin an sawi thung. Union Minister Venkaiah Naidu chuan eptu party chuan loneituten nawrh an huaihawt mek chu tharum thawhna chawh chhuahna hmanrua atan an hmang niin a sawi. Congress-in buaina thleng mek politics khelhna remchanga a lo hmang chu pawi a tih thu a sawi.
Nimin khan buaina chhuak vanga Mandsaur leh Phpliamandi-a curfew puan chu thlahdul a ni a, mahse police official-te chuan Aam Aadmi Party team-in tlawh an tum an remti dawn chuang lo tih an sawi. AAP chuan loneitute harsatna chu BJP sorkar chuan a ngaihsak lo nia sawiin, an harsatna leh an dinhmunte enfiah tur hian party team tirh an tum thu a sawi a ni. Mahse police-te chuan thuchhuah siamin, curfew thlahdul a ni lai pawhin pawn lam mite chu Mandsaur district-ah hian a luhtir dawn lo tih an sawi.