Gorkha-te’n Mamata Banerjee policy an dodal

West Bengal Chief Minister Mamata Banerjee-in an state chhunga school zawng zawngah Bengali ṭawng zirtir vek a tumna chu Gorkha Janmukti Morch (GJM) chuan dodalin, Darjeeling-ah duh lohna an lantir.

GJM chuan All India Trinamool Congress sorkar chu ‘divide and rule policy’ hmangah an puh a, lungawi lohna lantirna hmunah hian tharum thawhna te a thleng zui a ni. Nimin khan Darjeeling khuaah darkar 12 awh bandh an huaihawt bawk.

Bandh huaihawt vang hian khualzin 45,000 vel chu an tangkhang a, dan leh thupek kengkawh turin sipai ṭhahnem tak tirh an ni.

Lungawi lohna lantirtute hian police motor tichhiain, an hal bawk a, mipui pungkhawmte hnawhdarh nan police-te chuan tear gas an hmang. GJM member-te chuan hill area huamchhung school-a Bengali ṭawng zirtir vek tura tih chu an duh lo a ni.

Chief Minister Banerjee-i chuan GJM-te’n Bengali ṭawng zir luih tir tum nia an sawi chungchang chu chhangin, hills area-ah Bengali chu compulsory subject-ah dah a ni lo a, Nepali ṭawng pawh pawmsak an nih thu a sawi.