Punjab leh Haryana-ah loneituten nawrh huaihawt ve dawn
Madhya Pradesh-a loneituten hun eng emaw chen nawrh an huaihawt hnuah, Punjab leh Haryana state-a loneitute chuan an thlawpna lantirin karleh Thawhṭanni khian nawrh huaihawt ve an tum thu an sawi.
Punjab-a loneitu pawl, Bhartiya Kisan Union (BKU, Ekta group) chuan state pum huapa nawrh huaihawt an tum thu an sawi. MP-a loneitute nawrh huaihawt mekte an thlawp thu sawiin, an state-ah pawh loneitute loan ba ngaihdam sak tura an phut nghal tur thu an sawi bawk. Nawrh hi chawhma dar 11 aṭanga tlai dar li thleng neih a ni ang a, tunhnaia Madhya Pradesh-a Mandsaur district-a loneitute nawrh huaihawtte lam hawia silai hmetpuak police official-te chu thubuai siamsak phutna an lantir bawk ang.
Union secretary Sukhdev Singh Kokri chuan Punjab sorkar chu inthlan dawna a lo tiam tawh ang ngeiin loneitute leiba ngaidam turin an phut tih a sawi a, hei hi state sorkarin a tihlawhtling lo a nih chuan July 7 khian kal zel dan ngaihtuahin state level meet an neih tur thu a sawi.
Haryana-a loneitute pawhin MP-a nawrh huaihawt mekte an thlawpna lantir an tum bawk a, vawiin hian new Delhi-ah inhmukhawmin nawrh huaihawt dan tur hi an rel ang.