MP : CM-in tiamchin awm loin chaw a nghei Congess-in nawrh huaihawt

Madhya Pradesh-ah loneituten nawrh an huaihawt avangin tual­chhung buaina nasa tak a chhuak a, Chief Minister Shivraj Sigh Chouhan chuan an state buaina chinfel ngei tiamin, boruak ṭha a awm hma loh chu tiam chin awm loin chaw nghei a kalpui dawn. Hetih lai hian Congres party chuan Bhopal-ah loneitute thlawpna lantirin nawrh an huaihawt.

CM chuan kar kalta Inrinni aṭang khan chaw a nghei ṭan a, “State pumah boruak muanawm a awm leh hma loh chuan chaw ka nghei chhunzawm zel ang”, a ti.

Shivaj Singh Chouhan chuan an state tan loneitute chu mi pawimawh tak an ni a, state hmasawnna tura tha thawhtu pawimawh tak an ni, a ti. CM chuan an state mipui zinga 65% aia tam chu lo neiha eizawng an ni tiin, an tel lo chuan state-in hma a sawn thei lo tih a sawi. Loneituten an harsatna tawh mek an sawite chu sorkar chuan a ngaihtuah a, an thlai thar chhuahte chu an hlawkpui ngeina turin sorkar chuan a man pawh a bithliah sak tur thu a sawi. CM hian Inrinni khan loneitu pawl tenau aiawh mi 15 leh, pawl lian zawk aiawh mi 236-te a lo hmu tawh bawk a ni.

Hetih lai hian Congress Party chuan Bhopal-ah nawrh huaihawt­in, loneitute zinga tharum thawhna thlenga buaina chawk chhuaktu chu BJP leh RSS worker-te an nih thu an sawi. State Congress hotu Arun Yadav leh Assembly-a eptu hruaitu Ajya Singh-te chuan BJP sorkarin tharum thawhna chawk chhuakah Congress party a puhna chu thu dik lo a nih tih sawiin, an party chu tharum thawhna thlen zawnga an chet loh thu a sawi. Yadav chuan loneitu nawrh huaihawtte awmnaah BJP hruaitu pakhat chuan amah zuitute hnenah tiang semin, tharum thawhna an thlen zawk a ni, a ti.

Loneitute nawrh huaiawtte leh police-te inkara innawrbuaina thlenga police-te kut tuara thi chu mi paruk an tling tawh. Zirtawpni khan police-te’n kut an thlak, Ghanshyan Dhakad chu a hliam tuar loin a thi ve leh a ni.

Madhya Pradesh-ah hian loneitute hian June 1 aṭang khan an loan ba ngaihdam leh, an thlai thar chhuah man to zawka bithliahsak phutin nawrh an huaihawt ṭan a ni.