Jaya-i ina a vahnu kal tur dang

Tamil Nadu Chief Minister hlui, AIADMK hruiatu hlui J Jayalalithaa-i chenna-in, Chennai-a Poes Garden-ah nimin khan a vahnu neihchhun, Deepa Jayakumar-i chu a kal phalloin dan a ni a, hei vang hian amah zuituten lungawi lohna an lantir zui a ni.

AIADMK Amma camp chuan Deepa-i hian sawilawk loin Poes Garden hi a tlawh a, in kawta a ni thlalak chu pangpar a awrhtir duh niin a sawi. Hei hi phalsak a nih hnuin inchhungah luh a duh thu a sawi leh a, mahse in hi kalh a nih avangin an luhtir thei lo tih an sawi a, kalsawn tura an ngen thu an sawi. Mahse hetih lai hian in chhungah hian Deepa-i unaupa, Deepak chu a awm nia sawi a ni thung.

Deepa-i thlawptute chuan inchhunga a lut tur hi AIADMK Amma deputy general secretary TTV Dhinakaran thlawptuten an lo dang nia sawiin lungawi lohna an lantir a ni. An inhnial buai tak avangin police-te tirh an ni.

Jaya-i thih hnuah a inah hian AIADMK ge­neral secretary V K Sasikala a awm zui a, mahse a sum lakluh phu loa hausaa puhna thubuaiah thiam loh chantir a ni. Kum­in February thla khan Bengaluru court chuan thiam loh a chantir a, Bengaluru jail-ah a tang mek a ni.

AIADMK hnuaia Panneerselvam-a lamṭangte chuan Poes Garden hi midangin luah zui lo a, Jaya-i hriatrengna hmun atana siam an phut a ni.