GST Council-in item 66-a chhiah lak zat titlem

Sorkar laipuiin state hrang hranga inang tlanga chhiah lakna tur dan thar a duan, Goods and Services Tax (GST) chu July 1 aṭanga hman ṭan tuma inbuatsaih zel a ni. Pathianni khan GST council chuan chhiah lak dante ennawnin a bihthliah thar a, item 66-a chhiah lak zat tihhniam a ni.

Finance Miniter Arun Jaitley-a chuan Pathianni-a GST council meeting vawi 16-na neih zawh hnuah, GST revised rate thar hi a puang a ni. GST council-ah hian state tina finance minister-te an tel a ni.

Chhiah lak zat siamthar zingah hian pacakge food item - pickle, ketchup, topping leh instant food mix-a chhiah 18% lak ṭhin chu 12%-ah tihhniam a ni dawn a, diabetes-te tana pawimawh insulin-a chiah lak pawh 12%aṭangin 5%-ah tihhniam a ni bawk. School bag-a chhiah lak chu 28% aṭangin 18%-ah a tihniam a, drawing book-a chhiah 12% lak ṭhin chu tihawp a ni ang.

Computer printers leh CCTV camera-a chiah 28% lak ṭhin chu 18%-ah a tla thla dawn a, entertainment tax lak dan pawh tihdanglam a ni bawk. Jaitley chuan, “Entertainmet tax hi state sorkarin a la ṭhin a, 20% aṭanga 110% thleng pawh lak a ni ṭhin. Mahse state sorkar hian tual­chhung ṭawnga film siamte erawh chu chhiah a awltir fo bawk a ni”, a ti. Entertainment tax chu category pahnihah ṭhen a nih thu minister chuan a sawi. Film ticket man, Rs 100 chin chunglamah chuan tax 28% lak a ni ang a, Rs 100 leh a hnuai lamah chuan 18% lak a ni thung ang.

Sumdawng leh thil siamtu tenaute pawhin GST revised rate hi an hlawkpui dawn hle a ni. Kum khata an sum dehchhuah nuai 20 tling lote chuan chhiah an pek a ngai lo ang. Kum khatan Rs nuai 20-75 hralh chhuakte chuan composition scheme hnuaiah nominal tax an pe ang. Composition scheme hnuaiah hian sumdawng chuan tax hi 1% a pek a ngai a, thil siam chhuaktu, manufacture chuan 2% pein, restaurant neitute chuan 5% an pek a ngai a ni.