GJM-te’n tiamchin awm loin nawrh huaihawt ṭan

Gorkha Janamuk­ti Morcha (GJM) chuan West Bengalaṭanga Gorkhaland state hran siam phutin niminaṭang khan Darjeeling-ah tiamchin awmloin nawrh an huaihawt ṭan.

GJM president Bimal Gurung chuan Bengal sorkar chuan an ramaṭanga chhiah tam tak laksakin an ram a luahsak tih sawiin, hei vang hian Gorkhaland hran din an duh tih a sawi. An thil phut an lantirnaah hian tharum thawhna lam hawia chet an tum loh thu a sawi bawk.

GJM general secsretary Roshan Giri chuan June 13 hian an thil phut chungchang ngaihtuahin all party meeting koh a nih thu a sawi.

Nimin aṭang khan Gorkhaland Territorial Administration, Bengal government leh Central Government office-te chu khar an ni a, court erawh hawn a ni. Bank-te chu Thawhṭanni leh Ningani-ah an inhawn phalsak an ni bawk. Bandh huaihawt hian school leh college-te a huam tel lo thung.

Giri chuan Union Home Minister Rajnath Singh hnenah West Bengal sorkar­in an bial a hrek dante pawh ziakin an hrilh tawh niin a sawi a, sorkar laipui hnenah an chunga state sorkar chet dan chu sawipui an la tum tih a sawi.

Hetih lai hian West Bengal Chief Minister Mamata Banerjee-i chuan GJM nawrh huaihawt chu thil huathlala tak a ni tih sawiin, hills area mipuite chu boruak muanawm tak siam turin a ngen. GJM hian state hran pek an phut bakah, state sorkar­in sorkar school zawng zawnga Bengali ṭawng zir vek tura a tih chu an dodal bawk a ni.