MP hrem zinga 5-te'n Parliament complex-ah zan an riak

Parliament Monsoon Session neih mekah eptu MP 24 hrem zinga pangate chu Nilaini zan khan Parliament complex-a Mahatma Gandhi lim bulah an riak. MP hremte hian Nilaini aṭang khan hrem an nih avanga lungawi lohna hi darkar 50 chhung lantir an tum tih an lo sawi tawh a ni.

Parliament complex-ah hian puan-in (tent) kaih phal a nih loh vangin MP panga hi Gandhi lim bulah an mu a ni.

Eptu MP 24 hrem zinga 20 chu Rajya Sabha MP niin, Lok Sabha member pali an awm bawk.

Gandhi lim bula riak zinga mi, Trinamool Congress (TMC) Rajya Sabha MP Derek O'Brien chuan, "Eptu MP-te hian chawl loin darkar 50 chhung lungawi lohna kan lantir dawn. Darkar 21 kan hmang zo tawh a, darkar 29 kan la nei. MP 24-te hremna hi sut tur leh, House-a thil sawiho tur kan duhte pawh sawiho ngei kan phut a ni," tiin nimin zing khan a sawi. Eptute hian Parliament in hnihah ram chhunga thil man sang chungchang sawiho an phut a, mahse sorkar lam hian a la remti lo a ni.