PM Modi kaihhruai sorkarah MP hrem 170% in an pung

Kum 2014-a BJP kaihhruai National Democratic Alliance (NDA)-in central-a sorkarna an chan aṭangin, kum riat chhungin Parliament in hnih aṭanga MP hrem Congress kaihhruai UPA sorkar lai aiin 170% in a pung.

Lok Sabha leh Rajya Sabha Secretariat-te data aṭanga a lan danin, UPA sorkar lai, kum 2006 leh 2014 (February) chhung khan Parliament Monsoon session laia MP hrem chu 51 an ni. Hetih lai hian BJP kaihhruai NDA sorkar a din hnu, kum 2014 (April) aṭangin tuna Parliament Monsoon session neih mek inkarah MP 139 hrem an ni tawh thung.

Parliament expert leh eptu MP-te chuan tun hma lama thil thleng tam lo tak, House aṭanga MP-te hrem hi tun hnai kum rei vak lo aṭang khan a tam chho ta hle tih an sawi. Lok Sabha secretary general hlui, PDT Achary chuan he thil hian rorel lam leh eptu lamte inepna boruak ṭha lo tak a awm ṭhin tih a tilang a, political lama an khingpuite ni loin hmelma ang maiin an in en tawh a ni, a ti. Hei hian Parliament rorel kal tluang tur a tihbuai bakah, sawiho mumal loin bill pawh pass a nih phah fo tih a sawi bawk.

Prime Minister Narendra Modi kaihhruai sorkar term hnihna, kum 2019 aṭang khan Rajya Sabha bikah MP hrem hi an pung nasa hle.