Congesss MP thusawi vangin BJP MP-te'n lungawi lohna lantir

Congress MP Adhir Rajan Chowdhury-a'n president Droupadi Murmu-i chungchang a sawinaah 'rashtrapatni' (patni hi Hindi-in nupui tihna) a tih a hman avang chu President zah lohna lantirna a ni tiin nimin khan BJP MP-te chuan lungawi lohna an lantir a, Congress party president Sonia Gandhi chu an party MP thusawi avangin thupha chawi turin an phut.

Chowdhury chuan 'rashtrapatni' tih chu vawi khat chiah a hman thu leh, a ṭawng sual palh a nih thu sawiin, President zah lohna lam a nih loh thu a sawi. "Ka ṭawngsual palh tih ka hriat chuan media mi min kawmtute hnenah pawh hei chu tilang lo tura ngen nghal ka tum a, mahse ka hmu zo mai ta lo a ni," a ti. India President chu eng mi pawh ni se, Brahmin emaw, tribal emaw pawh ni se, mi zawng zawngin an zah em em vek a ni, tiin a sawi. Rorellai party member-te chuan a thusawi hi a nihna bakin an lavung niin a sawi bawk.

BJP member-ten Congress MP ṭawngkam hman chungchang lungawi lohna lantira House chhunga an aubuai avangin nimina Lok Sabha rorel inkhawm chu tihtawp a ngaih phah a ni.