Chhattisgarh sorkarin fiahna a paltlang

Chhattisgarh-a Congress sorkar chuan eptu party, BJP-in sorkar rin tawk lohna motion an putluh chu voice vote hmangin a paltlang.

BJP hian Congress sorkar chu eirukna hrang hranga inhnamhnawih leh inthlan dawna a thutiamte tihhlawhtling loah puhin, sorkar rin tawk lohna motion hi a pu lut a ni. Sorkar lam chuan eptute puhna hi hnawlin, eptu lam chuan sorkar beihna tur mumal tak a nei lo niin a sawi thung.

Darkar 13 chhung zet sawiho a nih hnuah Nilaini zan, zanlai pelh hnuah voice vote lak a ni a, sorkar chuan hnehna a chang a ni.

Chief minister Bhupesh Baghel chuan eptute puhna chu thu dik lo a ni tih sawiin, a kaihhruai sorkar chuan state mipui mimal tinte chu a pawimawh berah dahin welfare scheme-te a siam a ni, a ti. An state chu malnutrition awm lohna, zirna quality ṭha awmna, health facility leh employment ṭhatna hmuna siam tumin a kaihhruai sorkar chuan kum thum leh a chanve chhung theihtawpin hna a thawk tawh tih a sawi. BJP chu politics phuba lak lam ringawt buaipuiah a puh bawk.

BJP-in Congess sorkar hnuaiah sakhaw inlehna a thleng nasa tih leh, hma engmah a la lo tia an puhna pawh chhangin, CM chuan an state-a Kristian biak-in awm zinga 95% chu BJP-in kum 15 ro an rel chhunga sak leh din vek a ni, a ti. A kaihhruai sorkar chuan an state-a boruak muanawm leh sakhaw hrang hrang kara inunauna awm chu tihchhiat a duh ngai dawn lo tih a sawi.