Bawng phurtu Tamil Nadu official-te kut thlak

Rajasthan-a Barmer district-ah tual­chhung mi 50 vel, bawng humhalhtu intite chuan bawng phurtu Tamil Nadu official leh staff-te kut thlakin, an motor an halsak.

Tamil Nadu-a Animal Husbandry Department hian Jaisalmer aṭangin bawngpui leh a note 50 an lei a, an state lama phurh hawna turin sub-divisional magistrate aṭang pawhin phalna an nei a, document pawimawhte pawh an nei tel vek a ni.

Mahse tualchhung mipuite hian motor-a bawng phurh an hmuh hian bawng tawlhruk tumah puhin, official leh staff-te hian bei zui ta mai a ni. Official pahnihin hliam an tuar a ni.

Pawikhawih thlenna hmunah hian police-te tirh an ni a, mipui pungkhawmte chuan police-te pawh hi an lo bei nghal a ni. Poice-te hian tiang nen mipuite hi hnawhdarh tumin an bei a, National Highay 15 pawh darkar thum vel khar a nih phah bawk.

Barmer district-a thil thleng vang hian mi pali man an ni a, police pasarih chungah action lak a ni bawk. Police-te hi pawikhawihna thleng ngaihven tawk lo leh, buaina chingfel tura a hmun thleng har lutukah puh an ni a, hrem zingah hian inspector pawh a tel. Mi 50-te chu thubuai siamsak an ni bawk.

CPI (M) chuan pawikhawihna thlen chhanah hian BJP puhin, BJP chu India mipuite inkara inhuatna leh inṭhendarhna thlentuah an puh. CPI(M) general secretary Sitaram Yechury chuan BJP politics chuan khawtlangah inhuatna leh boruak ṭha lo a thlen chho mek a ni, a ti.

Tun ṭum hi thla hnih chhunga Rajasthan state-a bawng humhalhtu intiten tharum thawhna an thlen ṭum hnihna a ni. April 1 khan Hryana aṭanga kal, bawng zuara eizawng Pehlu Khan bawng humhalhtu pawlin na takin kut an thlak a, ni hnih hnuah a hliam tuar loin a thi a ni.