June 26-ah Modi leh Trump inhmu dawn

Prime Minister Narendra Modi leh US President Donald Trump-te chu June 26 hian White House-ah an inkawm dawn.

White House Press Secretary Sean Spicer chuan hruaitu pahnihte inhmuh tur thu hi tihchian a nih tawh thu a sawi. Hei hi US President atana Donald Trump lakluh a nih hnua meeting an neihna hmasa ber tur a ni.

Spicer chuan thu­chhuah siamin, President Trump chuan PM Modi nena meeting an neih tur hi a nghakhlel tawh hle a, he hunah hian ram pahnihten an ngai pawimawh hrang hrangte, firfiakte beihlet chungchang te, economy lama hmasawnna leh insiamṭhatna turte, security lama thawhdunna turte an sawi dawn a ni, a ti.

Modi hi June 25 hian US-ah a zin dawn a ni. External Affairs Minister Sushma Swaraj-i chuan Modi hian US President nena an inkawmnaah hian US-in H-1B visa tihtlem a tum chungchang pawh a sawipui dawn niin a lo sawilang tawh. H-1B visa hi US-a Indian IT worker tam zawkin an hmang a ni.

Kum 2001-2015 chhung khan H-1B visa hi maktaduai 1.8 vel pekchhuak niin Pew Research Cen­ter chuan a tarlang. Hemi kum chhunga a pekchhuah zing­a 50.5% chu India mite hnenah pek a ni bawk.

US-India insumdawn tawnna hi kum 2000 aṭang khan a let ruk zet­in a pungchho tawh a, kum 2016-a ram pahnihnte insumdawn tawnna chu US dollar tluklehdingawn 115 hu a tling niin, White House chuan a tarlang.