GJM-in sorkar office hal

West Bengal hmarlam aṭanga Gorkhaland state hran siam phuta nawrh huaihawt, Gorka Janmukti Morcha (GJM) chuan state sorkar office-te suasamin an hal.

GJM hian Thawhṭanni aṭang khan tiamchin awm loin nawrh an huaihawt a, an nawrh huaihawt chu a hlawhtling hle niin an sawi. State hran an phut chung­changah leh, West Bengal sorkarin hill area a hrekbeh chungchangah sorkar laipui chu inrawlh turin an phut.

Nawrh huaihawt hi hill area huamchhungah neih a ni a, sorkar office leh building te khar tir an ni. Mahse bandh hian zirna-in leh transport lam erawh a huam tel lo thung.

Thawhṭanni zing khan Darjeeling-a Bijanbari-a Block Development Office (BDO) building chu suasamin hal a ni a, he pawikhawihna thleng kaihhnawihah hian GJM worker pathum man a ni. Tlai lamah PWD office chu hal a ni bawk a, Pulbazar district-a BDO office chu suamam a ni bawk.

GJM General Secretary Roshan Giri chuan hill district-a nawrh an huaihawt­naah hian buaina an siam loh thu a sawi a, sorkar office beihnaah an pawl chuan inrawlhna a nei lo niin a sawi bawk.

Nawrh huaihawt vang hian khualzin sang tel an tangkhang mek a, heng khualzinte hruai chhuah nan hian state sorkar chuan bus 45 a tir tawh a ni. State Tourism Minister Gautam Deb chuan khualzinte chu chiai lo tura ngenin, theihtawp an chhuah zel tur thu a sawi.