MP CM-in Mandsaur a tlawh

Madhya Pradesh Chief Minister Shivraj Singh Chouhan chuan nimin khan loneitute nawrh huaihawtna-a police-te silai hmehpuah avanga mi panga an thihna, Mandsaur khua a tlawh. CM hian thi chhungte zinga pakhat hnenah cheng vaibelchhe khat cheque a hlan a ni.

State sorkar chuan loneituten nawrh an huaihawtna-a thi, mi paruk chhungte chu cheng vaibelchhe khat ṭheuh a pek tur thu alo sawi tawh a ni. He sum hi chief minister discretionary fund aṭanga pek a ni a, Mandsaur collector-in thi chhungte hnenah hian e-payment hmangin a pe dawn niin, public relations official chuan a sawi.

June 6 khan Mandsaur-a loneituten nawrh an huaihawtnaa buaina chhuakah mi panga an thi a, June 9 khan he district chhunga Badwa khuaah loneitu pakhat a thi bawk. Tualchhung mite chuan police-te'n an vuak vanga thi niin an sawi a ni.

CM Chouhan leh a nupui Sadhna-te hian nimin khan Badwan khua hi an tlawh a, loneitu thi chhungte chu an hmu a ni. CM chuan loneitute thihnaa mawhphurtute chungah na taka action lak a nih tur thu a sawi. Chouhan hian Lodh, Nayakheda, Piplyamandi, Barkheda Panth leh Budha khuate tlawh nghal bawk.