Darjeeling-ah sipai 600 thawn luh belh

West Bengal aṭanga Gorkhaland state hran phuta nawrh huaihawt mek, Gorkha Janamorcha Mukti (GJM)-te'n tharum thawhna an thlen avangin sorkar laipui chuan venhim hna thawk turin Darjeeling hills-ah paramilitary force 600 a thawnluh belh.

Sorkar laipui chuan hills district dinhmun kimchang report turin state sorkar a hriattir bawk.

Union Home Ministry thupuangtu chuan Darjeeling-a sipai awmsa 400 vel bakah 600 thawn belh a nih thu a sawi a, an zingah hian hmeichhia 200 an tel tih a sawi.

Home Ministry chuan Darjeeling dinhmun chu ngun taka an thlithlai reng thu sawiin, boruak muan-awm a awm theih nan state sorkar chu a theih anga puih a inhuam thu a sawi bawk.

Hetih lai hian Chief Minister Mamata Banerjee chuan hills district boruak chu a muanawm niin a sawi a, sorkar laipui pawhin report pe turin a ti lo niin a sawi thung.

GJM-te hian state hran phutin Thawhṭanni aṭang khan tiam chinawm loin nawrh an huaihawt a, sorkar building leh office-te an dang a ni. Buaina a chhuah avangin dawr te pawh an inkhar bawk.

GJM hruaitu Bimal Gurung chuan an thil phut chungchangah political party hrang hrang ten meeting an nei tih sawiin, Gorkhaland state hran phuta hmalakna chu chak zawka kalpui an rel niin a sawi. Gurung chuan sorkar laipui leh minister-te pawh a bepawp reng tih sawiin, an harsatna tawhte leh thilput te pawh an hriat-

thiampui a, Gorkhaland state an phutna pawh ngaihtuahsak an lo tiam niin a sawi. "Sorkar laipui hi kan thawhpui a ni a, kan thil phut pawh hi min ngaihtuah sak ngei ang", a ti.

Bimal Gurung chuan West Bengal CM chu sipaite a koh luh avangin a sawisel a, hills area mipuite lak aṭanga inthliarfihlim turin a ti. Hills area mipuite chuan CM Banerjee-i kaih-hruai Trinamool Congress thil tumte chu an pawm dawn lo tih a sawi bawk.