Singapore-a summit-ah Kejriwal tel thei dawn lo A zinna tur tihkhawtlai sakah sorkar laipui puh

Delhi chief minister Arvind Kejriwal-a'n Singapore-a World Cities Summit hmang tura kal a tum chu thil tihfel ngaite tihfel hman a nih tak loh avangin a kal thei ta lo. Delhi-a Aam Aadmi Party (AAP) sorkar chuan sorkar laipui chu Kejriwal zinna tur tihkhawtlai sakah a puh.

World Cities Summit-ah hian thusawi tur zingah Kejriwal hi telh a ni. Mahse a zinna tura atan tihfel ngaite chu July 20-ah tihfel hman vek a ngaih laiin, Delhi lieutenant governor VK Saxena hian phalna hi July 21-ah a pe chauh niin Delhi sorkar thuchhuah chuan a tarlang.

"Zin chhuah phalna hi June 7-ah Lt Governor hnenah thawn a ni a, LG hian thla khat leh a chanve chhung chhanna engmah a pek loh hnuah, July 21 khan file hi a thawn kir chauh a ni. Mahse July 20 thleng tihfelna tura hun pek a nih avangin hun tiam hi a lo zo hman tawh a ni," a ti.

Sorkar laipui chuan Delhi-a AAP sorkarin hna a thawh ṭhat dan chungchangte sawi tura Chief Minister zin tur chu dan beh a tum tlat a ni tiin AAP sorkar chuan a sawi.

June thla khan Singapore High Commissioner Simon Wong chuan Kerjiwal hi summit-a tel tur hian a lo sawm tawh a, ani pawhin remtiin August 1-a thu sawi tura tih a ni. Mahse a zinna tur thil ṭulte hi sorkar laipui lamin a tihfel sak duh mai lo a, Lt Govenror chuan he programme hi mayor programme a ni a, Chief Minister kal a ngai lo tiin a lo chhang.

Kum 2019 khan sorkar laipui chuan hetiang programme bawka Kejriwal zin tur chu a lo dang tawh bawk. A kal theih loh avangin Kerjiwal hian meet-ah hian online hmangin thu a sawi phah tawh bawk a ni.