Parliament Complex-ah eptu MP-te'n nawrh chhunzawm

Eptu MP hremte chuan nimin thleng khan Parliament Complex-a Mahatma Gandhi lim bulah lungawi lohna lantirin nawrh an huaihawt chhunzawm.

Parliament Monsoon session neih mekah eptu MP 27 hrem an ni tawh a, an zinga MP 23 chu Rajya Sabha member niin Lok Sabha member pali an tel bawk. Ningani khan Rajya Sabha-a Aam Aadmi Party (AAP) MP pahnih leh Assam independent member pakhat chu hrem an ni leh a ni. Tun ṭum hi Parliament upper house, Rajya Sabha-a session khat chhunga member hrem an tam ber ṭum a ni.

MP hrem tawkte hian Nilaini aṭang khan darkar 50 chhung atan lungawi lohna an lantir ṭan a, nimin tlai dar 5 thleng khan a awh a ni. Zanah pawh Parliament complex hi chhuahsan loin an riak zui a ni.

Parliament session hi July 18 aṭang khan neih ṭan niin, August 12 thleng a awh ang.

Eptu member-te chuan ramchhunga thil man sang zel leh, sorkarin GST rate a tihsan chungchang chu House-ah sawiho an duh tih an sawi a, mahse sorkar chuan a hlau a, sawiho theih loh dan kawng a ngaihtuah a ni, an ti. MP-te chu mipuite aiawh an nih avangin, ramchhunga mipui nghawng thil thlengte chu an aiawhin an sawi chhuak zel dawn tih an sawi a, hei hi democratic system pawh a nih thu an sawi bawk. Hetih lai hian sorkar lam chuan mipuite aiawha member-ten aw an chhuah tur chu an hlau a ni, an ti.