Rajasthan-a IAF fighter aircraft tlaah pilot 2 an thi

Rajasthan-a Barmer district-ah Ningani zan khan Indian Air Force (IAF) MiG-21 fighter aircraft a tla a, pilot pahnih an thi.

Barmer District Collector chuan IAF thlawhtheihna hi Baytoo-a Bhimda khaw bulah a tla a, a kang zui tih a sawi.

IAF chuan twin-seater MiG-21 hi Rajasthan-a Utarlai air base aṭanga training neia thlawk chhuak a nih thu a sawi a, zan dar 9:10 velah a chesual a ni. Thlawhtheihna chesuala thi, pilot pahnih chhungte an tuarpui thu an sawi bawk. An chetsual chhan hi chhui chiang turin thupek pawh tihchhuah nghal a ni.

Kum 1960 chho aṭanga IAF-ten an neih ṭan, Soviet-origin MiG-21 aircraft-te hi ṭum 200 vel zet an chesual tawh a ni. Kumin March thla khan minister of state for defence Ajay Bhat chuan kum nga chhungin service pathumah aircraft leh helicopter chetsualna avangin defence mi leh sa 42-in nunna an chan tih a sawi. Kum nga chhungin thlawhtheihna chetsualna hi ṭum 45 a thleng bawk a ni.