PM-in power man ba rul turin state-te a nawr
Prime minister Narendra Modi chuan power man ba nei state-te chu an ba rul turin a ti. State hrang hrangten power hmanna man an ba tlingkhawm hi Rs vbc nuai 2.5 vel a tling.
PM Modi chuan state tam takin power distribution company (discom) leh generating company (genco)-a leiba tam tak an neih avangin heng company-te hian sum lamah harsatna an nei chho niin a sawi. Energy leh power sector chu India-in hma a sawnna tura chanvo pawimawh tak nei an ni tiin, hei vang sum lama harsatna an tawh mek chu chinfel a nih thuai theihna turin state-te chu an leiba hi a rang thei anga rul turin a ti a ni.
Modi chuan power company-te chuan state hrang hranga man tlawm zawka power an pekna man pawh a hun takah leh, a full-in an dawng thei lo a ni, tiin power distribution sector sum hloh chu double digit a tling a, hetih lai hian developed country-ah chuan single digit chauh a ni, a ti.
Kum riat liam ta chhung khan electricity siamchhuah hi MW 1,70,000 vela a pun thu sawiin, "One Nation One Power Grid tih chu vawiina kan ram chakna bul a ni," tiin Prime Minister chuan a sawi. Saubhagya Scheme hnuaiah ram pumah transmission line km 1,70,000 thlun ni tawhin, connection vaibelchhe thum pek a ni tawh tih a sawi bawk.
Union power ministry data aṭangin, Maharashtra chu gencos laka leiba ngah ber niin, Rs vbc 21,500 a ba mek. Tamil Nadu-in dawtin Rs vbc 20,990 leh Andhra Pradesh-in Rs vbc 10,109 ba an nei mek bawk a ni.
Hetih lai hain Telangana chu discom laka ba ngah ber state niin, leiba Rs vbc 11,935 a nei mek. Maharashtra-in Rs vbc 9, 131 leh Andhra Pradesh-in Rs vbc 9,116 leiba an nei bawk.
State leh UT-ten power leina sum tam tam an batsak bakah, discom hian programme hrang hrang hnuaia state-te hnena subsidy-a power a pekna man, Rs vbc 76,337 a la dawng lo bawk tih ministry data chuan a tarlang.
Profile picture-ah India flag hmang turin ngen
Prime minister Narendra Modi hian nimin khan thla tina radio programme a hman ṭhin, Man Ki Baat vawi 91-na hmangin, August 2-15 chhung hian social media account-a an profile picture-ah India flag, 'tiranga' hmang turin mipuite a ngen.
Sorkar laipuiin India zalenna champha vawi 75-na lawmna, Azadi ka Amrit Mahotsav a buatsaih hnuaiah August 13-15 chhung hian special movement, 'Har Ghar Tiranga' buataih a ni dawn tih Prime Minister chuan a sawi. He movement kalpuina tur hian hemi chhung hian in tinah India flag zar vek turin a ngen a ni.
"August 2 hi India Flag design tu, Pingli Venkhaiya piancham a ni. Hei vang August 2-15 chhung hian social media account-a profile picture-ah hmang turin ka ngen vek che u a ni," a ti.