Congress MP Chowdhury-a'n thupha chawi turin Smriti Irani phut

President Droupadi Murmu a sawinaa 'Rashtrapatni' tih a hman avanga BJP lamin nasa taka an sawisel, Congress MP Adhir Ranjan Chowdhury chuan union minister Smriti Irani chu President tih hmang loa 'Droupadi Murmu' tia a sawi avang thupha chawi turin phut let ve leh.

Congress hruaitu hian nimin khan Lok Sabha speaker Om Birla hnenah lehkha thawnin, Irani hian President chungchang a sawi danah thupha chawina tichhuak ngei tura a phut thu a sawi a ni.

'Rashtrapatni' tia a sawi avangin BJP chuan Chowdhury bakah, Congress interim president Sonia Gandhi chu thupha chawi turin an lo phut tawh a, BJP MP-te chuan lungawi lohna an lantir tawh bawk. Chowdhury hian a thusawi chu a ṭawngsual palh a nih thu leh, vawi khata chiah hetianga a sawi thu tarlangin, ziakin President Murmu hnenah pawh hian ngaihdam a dil tawh a ni.

Hetih lai hian Speaker hnena lehkha a thawnah, Chowdhury chuan House-a Union Minister Irani-i'n President hming a sawi dan chu a thil dik lo leh, President dinhmun nena inmil lo a ni, a ti. "Droupadi Murmu tiin President tih emaw, Madam, Smt tih emaw engmah sawi loin vawi eng emaw zat a sawi a ni. Hei hi President dinhmun dah hniamna a ni. Hei vang hian Srmiti Irani chuan chhuanlam engmah nei loin President hnenah, zah lo taka a thusawi avang hian thupha a chawi ngei tur a ni," a ti.