SC-in sorkar laipui hriattirna pe

Supreme Court chuan sorkar laipuiin talh tura bawng zawrh leh lei khapna a tihchhuah chungchanga petition thehluh chu ngaihtuahin, sorkar laipui chu kar hnih chhunga a chhanna thehlut turin a ti. Hemi chungchang hi July 11-ah ngaihtuah a ni ang.

Petition hi Hyderabad lawyer, Fahim Qureshi-a thehluh a ni a, Qureshi hi All India Jamiatul Quresh Action Committee president a ni. Kerala state sorkar leh pawl hrang hrang pawhin sorkar laipuiin bawng talh a khap chungchangah complaint an lo thehlut tawh bawk.

Supreme Court chuan petition thehluttuin sorkar laipuiin bawng talh khapna thupek a siam chu ram danpui kalh leh inthliarhranna lantirna nia a sawi chungchang chu chhang turin a ti a ni. Hei bakah hian he khapna thupek hian loneitu rethei tak takte eizawnna thlengin a nghawng pawi thei dawn niin Qureshi chuan a sawi a, BJP-in bawng talh a khapna chhan chu Hindu ram siam a tumnaa a hmalakna kawng khat a ni, a ti.

May 25-a sorkar laipuiin talh atana bawng zawrh leh hralh khapna thupek a tihchhuah chuan ramchhung hmun hrang hrangah sawisel a tawk a, duh lohna lantirin vei eng emaw zat nawrh huaihawt a ni bawk. Ministry of Environment, Forests and Climate Change-in Prevention of Cruelty to Animals (Regulation of Livestock Markets) Rules, 2017, a tihchhuah hnuaiah hian bawng chu talh atan ni lo, leilet leh huana chhawr tur atan chauha lei phal a ni.

Sorkar laipui chuan talh tura bawng hralh leh zawrh khapna dan sawizui hlawh tak chu, kengkawh vek tura state sorkar-te nawr luih a tum lo tih a sawi. Madras High court-in thupek a tihchhuah angin, bawngsa khapna dan chu kar hnih chhung atan tihtawp lailawk a ni tih additional solicitor general P Narsimha chuan a sawi bawk.