AAP cheng nuai 27 chawi turin hriattir

Delhi sorkar-a Public Works Department (PWD) chuan rorellai, Aam Aadmi Party (AAP) chu phalna nei loa party office luaah puhin cheng nuai 27 chawi turin a hriattir.

APP hnena sum chawi tura hriattir hi licence fee aiin a let 65 zetin a tam a, office hi an chhuahsan loh chuan an sum chawi tur pawh hi a la punbelh dawn a ni.

April thla khan PWD chuan AAP National Convenor Arvind Kerjiwal-a chu hrittirna pein, Rouse Avenue office chu dan kalha luah an ni tin chhuak nghal turin a lo hrilh tawh a ni. Mahse AAP hian political party dange pawh office atan bungalow te luahtir an ni tho tih sawiin, dan hremi te rawih an tum thu a sawi a ni.

Delhi Lt Governor hlui Najeeb Jung chuan AAP sorkarin thutlukna hrang hrang a siam chungchanga file 400 chuang ennawn tura a din, member pathum awmna Shunglu committee chuan AAP office luahtir danah hian thil dik tawk lo a awm niin an sawi. Hei bakah hian Lt Governor ṭanglai Anil Baijal chuan chief secretary hnenah AAP hian adverstiment tihchhuahna atana sorkar sum a hman, cheng vaibelchhe 97 chu la kir leh turin a lo hrilh tawh bawk.

Kum 2015 November thla khan AAP sorkar chuan state party-te tana ram pekna tur policy a pawm a ni. Hemi hnu hian hian AAP chu Rouse Avenue-a bungalow a luah a phalsak zui bawk. He bangalow hi Delhi minister hlui, eirua puh a nih avanga ban, Asim Ahmed Khan-a luah ṭhin a ni.