Abu Salem thiam loh chantir
Mumbai court chuan kum 1993-a Mumbai khawpuia bomb tihpuahnaa mawhphurtua puh Abu Salem leh midang panga-te chu nimin khan thiam loh a chantir a, he pawikhawihnaa inhnamhnawiha puh pakhat erawh chu thiam chantir a ni thung.
Kum 1993-a Mumbai khawpui beihnah hian bomb ṭum 12 zet tihpuah a ni a, mi 257 an thi a, mid ang 713-in hliam an tuar. Pawikhawihna thleng hian bungrua cheng vaibelchhe 27 hu a tichhe bawk a ni. India rama firfiakte pawikhawihna thleng rapthlak bera ngaih a ni.
Mumbai beihnaa mawhphurtu zinga puh mi pasarihte thubuai chu nimin khan Terrorist And Disruptive Activities (Prevention) (TADA) Act court chuan a ngaihtuah a ni. Abu Salem bakah Mustafa Dossa, Firoz Khan, Karimullah Shaikh, Tahir Merchant leh Riyaz Siddiqui-te chu thiam loh chantir an ni a, Abu Salem hnena ralthuam petua puh Abdul Qayyum Shaikh erawh chu thiam chantir a ni thung.
Salem hi Mumbai beihnaa ruahmantu zinga telah puh a ni a, actor Sanjay Dutt hnena silai petu a ni bawk.
TADA court chuan kum 2007 khan he pawikhawihna kaihhnawihah hian mi 100 thiam loh a lo chantir tawh a, kum 2013 khan Supreme Court chuan bomb tipuaktu Yakub Memon chu thi turin a chungthu a lo rel sak tawh bawk.
Mumbai khawpuia pawikhawihna rapthlak tak thleng hi a ruahmantu ber chu gangter Dawood Ibrahim Kaskar a ni a, bomb hi a thachhang dawltu Tiger Memon leh midangten an tipuak a ni. Mumbai khawpui beih a nih chhan hi 1992-a Babri Masjid tihchhiat a nih avanga phuba lakna a ni.
Bomb hi Bombay Stock Exchange, Kalbadevi, Shiv Sena Bhavan, Air India building, Fishermen’s coloney, Worli Century Bazar, Zaveri Bazar, Hotel Sea Rock leh hmun dangahte tihpuah a ni.