Airlines 7-in TDP MP hrem
Airlines company pasarih te chuan Telugu Desam Party MP JC Diwakar Reddy chu Visakhapatnam airport-ah mawi lo taka a chet avangin an thlawhtheihna an chuan an khap.
Ningani zing khan MP Diwakar Reddy hi Visakhapatnam airport aṭanga Indigo thlawhtheihna hmanga a thlawkchhuak tur a tlai avangin thawktuten a luh an remti tawh lo a, hei vang hian thawktute chungah mawi lo takin a che zui nia sawi a ni.
He thil thleng vang hian Indigo chuan Telugu Desam Party MP hi an thlawtheihnaa a chuan an remti tawh dawn lo tih an sawi a, hemi hnu hian airlines dangte pawhin an rawn zawm ve a ni.
Nikum October thla khan Reddy hi Vijayawada-a Gannavaram airport-ah Air India Office-ah thawktu pakhat chungah mawi lo takin a lo che tawh bawk. Kumin March thla khan Shvi Sena MP Ravindar Gaikwad chuan Air India staff senior chu business class seat a pek duh loh avangin kut a lo thlak tawh bawk a ni.
Indigo chuan Reddy hi Visakhapatnam-Hyderabad flight-a chuang tur a ni a, mahse departure time aia minute 28 tlaiah thlengin, boarding pass an pe thei lo tih an sawi. Boarding pass an pek theih loh avang hian Reddy hi thinrimin tharum a thawh zui a, furniture leh printer-te pawh a tichhe tel niin Indigo staff-te chuan an sawi.
He thil thlengah hian MP Reddy chuan Aviation Minister Ashok Gajapathi Raju chu biain inrawlh turin a ngen nia sawi a ni. Mahse aviation minister chuan TDP MP Reddy-a’n boarding pass a neih theih nana inrawlha an puhna chu thu dik lo niin a sawi a, Vizag Airport-a thil thleng chu chhui chian a nih tur thu a sawi.