Darjeeling-ah buaina a zual zel Civil mi pakhat thi, sipai 35-in hliam tuar

West Bengal aṭanga Gorkhaland state hran din phuta Darjeeling-a nawrh huaihawtnaah buaina a chhuah belh zel. Nawrh huaihawttu, Gorkha Janmukti Morcha (GJM) leh security force-te inkara buaina chhuak vangin civil mi pakhat a thi a, CRPF 35-in hliam an tuar.

Darjeeling-ah hian GJM hian state hran phutin June 8 aṭangin nawrh an huaihawt a, nawrh huaihawtte hian sorkar building leh office-te pawh an hal a ni. An thil phut an nawrnaah GJM leh police-te hi hmun hrang hrangah an innawr buai bawk.

GJM worker-te hian police leh sorkar hmun hrang hrangte petrol bomb, bur leh lung hmangin an bei a, security force-te hian mipui hnawhdarh nan hian tear gas an hman bakah, tiang pawh an hmang tel a ni.

Hill district hmun hrang hranga tharum thawhna thleng thunun nan sorkar laipui chuan army contigent pawh a tirlut tawh bawk.

Buaina chhuak a punlun zel vang hian Union Home Minister Rajnath Singh chuan Chief Minister Mamata Banerjee pawha be tawh a, CM chuan dan leh thupek kenkawh a nih theih nana state sorkarin hma a lak dan te, hill district-a boruak muanawm a awm leh theihna tura an beih dante a hrilh a ni.

CM Banerjee-i chuan hill district-a thil thleng chu a hma aṭanga phiarrukna awm a ni tiin, nikhat thilthuah bomb leh ralthuam tam tak lakkhawm theih a ni lo, a ti. Bengal ṭhendarh chu a remti ngai dawn lo tih sawiin, hemi atan hian a nunna hial hlan pawh a inpeih tih a sawi.

Banerjee-i chuan GJM chuan hmarchhak biala inlakhran duhtu pawl leh ram pawn lam pawlte nen inzawmna an nei niin a sawi a, GJM hi ram pawn lam aṭanga puitu an awm niin a sawi. West Bengal CM hian hill area-a buaina thleng hi central-a Prime Minister Narendra Modi-a kaihhruai sorkar chuan a tipunlun niin a sawi bawk.