Monkeypox virus : Sorkar laipuiin Task Force a din

Ram chhungah monkeypox hri kai pali hmuh ni tawhin, an zinga pakhat chu Inrinni khan he hri vang hian a thi nia sawi a ni. Sorkar laipui he hri chungchang zirchiang tur leh, a darh tur venna kawnga hma lak dan ngaihtuah turin task force a din.

Inrinni khan Kerala mi, UAE aṭanga rawn haw chu monkeypox hri vang hian a thi nia sawi a ni. Mahse hri vang hi a ni chiah em tih finfiah a la ni lo a, state health minister Veena George chuan high-level inquiry nei turin a hriattir tawh a ni.

Task Force din hi high-level meeting-ah rel a ni a, NITI Aayog member (Health) Dr VK Paul-a'n a ho dawn a, member-ah hian union health ministry, Pharma and Biotech secretary pawh a tel ang.

Dr VK Paul chuan monkeypox hri vei hi ram eng emaw zatah an pung chho zel tih a sawi a, hemi rual hian sorkar laipui chuan rang taka hma a lak nghal avangin mipuite tan lo chiai phahna tur a awm lo, a ti. Mipuite chu fimkhur tura chahin, monkeypox hri kai lan chhuahna ang an nei a nih chuan rang taka in report turin a chah.

WHO-in a tarlan danin, monkeypox hri vei hi ram 78-ah mi 18,000 chuang an awm tawh a ni. WHO hian monkeypox hri leng vang hian global health emergency a lo puang tawh bawk a ni.