Eptu party-ten lungawi lohna lantir chhunzawm zel

Parliament Monsoon session neih mekah eptu party-te chuan thil man sang, GST rate tihsan leh thil dang dangah sorkar laka lungawi lohna an lantir chhunzawm zel a, nimina Parliament in hnih rorel inkhawm pawh tihtawp a ngai leh a ni.

Nimina Rajya Sabha inkhawm chu eptu member-ten lungawi loha lantira an au leh avangin chhun dar 12 thleng inkhawm tihtawp a ni a, Question Hour hmang tura an luhkhawm leh hnuah pawh eptu member-te hi an au zui leh nghal a ni. MP ṭhenkhat chu House laiah chhuak khawmin, an lungawi lohna thute an aurualpui a ni. Mahse rorel inkhawm kaihruaitu, Bhubaneswar Kalita chuan Question Hour hi a kaltlangpui a, eptute aubuaina karah hun rei vak lo hun hman a nih hnuin chhun dar 12.40-ah inkhawm tihtawp a ni leh nghal.

Inkhawm a tihtawp hmain Kalita chuan eptu member-te hnenah leader of opposition Mallikarjun Kharge-a'n thil man sang chungchang House-a sawiho a phut thu leh, House leader Piyush Goyal-an naktukah sawiho anih tur thu a sawi tih a hrilh a ni.

Lok Sabha rorel inkhawmah pawh Monsoon session chhung atana Congress MP palite hremna sut tura phutin eptuten lungawi lohna a lantir a, inkhawm tihtawp lailawk a nih phah bawk.

Minister of state for parliamentary affairs Arjun Ram Meghwal chuan eptute chu rorel thei loa inkhawm tibuaia puhin, hetianga lungawi lohna an lantir ṭhin chuan House zahawmna a tihniam a ni, a ti.

Congress MP pali - Manickam Tagore, Ramya Haridas, TN Prathapan leh S Jothimani te chu kar liam ta Thawhṭanni khan House chhungah lungawi lohna lantir a, placard an lek chhuah avangin session neih mek chhung atan hrem a ni.