India-ah Monkeypox hri vei 7 an awm tawh

Kerala state-ah monkeypox hri vanga mi pakhat a thih hnuah, he hri vei hi mi pakhat hmuh chhuah belh leh a ni a, an state-ah hian monkeypox hri vei hi panga hmuh an ni tawh. India ram pumah hri vei mi pasarih an awm tawh a ni.

Kerala health minister Veena George chuan UAE aṭanga haw pakhat chu monkeypox hri a vei tih hmuh chhuah a nih thu nimin khan sawiin, Malappuram-ah enkawl a ni, a ti.

Monkeypox hri vanga mi pakhat a thih hnuah, a contact hnaivai mi 20-te chu khunghran mek an ni tih official-te chuan an sawi bawk.

July 14 khan India rama monkeypox hri vei hmuh chhuah hmasa ber niin, Kerala state mi, UAE aṭanga rawn haw a ni. July 27 khan Thrissur hospital-ah dah niin, Inrinni liam ta khan he hri vang hian a thi a ni.

Nimina Parliament inkhawma union health minister Dr Mansukh Mandaviya chuan monkeypox hri leng mek chungchangah sorkar laipui chuan theihtawpin hma a la tih sawiin, awareness campaign pawh neih mek a ni, a ti. Minister chuan, "Monkeypox hri hi India leh khawvelah pawh hri leng thar a ni lo. Kum 1979 aṭang tawh khan Africa ram lamah chuan he hri vei hi tam tak hmuh an lo ni tawh a ni. World Health Organisation (WHO) pawhin a ngaihven reng a, India ram dinhmun pawh uluk taka thlithlai reng a ni," a ti. Khawvel ram leh territory 75 ah monkeypox hri vei mi 22,000 chuang hmuh chhuah an ni tawh.