Kashmir inlakhran duhtu pawl hotuin chaw ngheia a nawrh titawp

Kashmir inlakhran duhtupawl hotu, Yasin Malik chuan a tanna, Tihar Jail-a ni 10 chhung chaw ngheia nawrh a huaihawt hnuah Thawhṭanni khan a nawrh a titawp

Prison official-te chuan thuneitu lamten Malik-a thil phutte hi ngaihtuah an tiam avangin chaw nghei hi a titawp ta niin an sawi.

Malik hian thiam loh chantir a nihna, Rubaiya Sayeed rukbo thubuai, Jammu court-a ngaihtuah a nih hnuah amah ngei inlan phalsak turin a phut a, mahse a thil phut chungchang hi sorkar laipuiin a chhan loh avangin July 22 aṭang khan chaw a nghei a ni.

Kum 56 mi, dan pawna hnawl Jammu and Kashmir Liberation Front (JKLF) hotu hi firfiakte suma ṭanpuia puh chungchangah dam chhung tang tura hrem a ni.

Director General (DG) of Delhi Prisons Sandeep Goel chuan Malik-a hnenah a thil phut chu thuneitu sang lamah thlensak a nih thu leh, an ngaihtuah tur thu a hrilh a, hemi hnu hian Malik pawhin chaw ngheia a nawrh huaihawt chu a titawp ve nghal bawk.

July 26 khan a blood pressure a ṭhat loh vangin Malik hi RML hospital-ah dah a ni a, mahse doctor-te hnenah enkawl a duh loh thu sawiin July 29 khan jail-ah a kir leh a, nawrh hi a chhunzawm leh nghal a ni.