PM Modi-a unaupa-in Jantar Mantar-ah nawrh huaihawt

Prime minister Narendra Modi-a unaupa, Prahlad Modi chuan nimin khan New Delhi-a Jantar Mantar-ah fair price shop dealer-te thil phut tihhlawhtlin sak tura sorkar nawrin nawrh a huaihawt.

Prahlad Modi hi All India Fair Price Shop Dealers' Federation (AIFPSDF)-ah vice president a ni a, nimin khan an pawl member dang eng emaw zat nen Jantar Mantar-ah an thil phut tihlawhtling tura phutin nawrh an huaihawt a, banner-te kengin, an thil phutte an aurualpui bawk.

AIFPSDF national general secretary Biswambhar Basu chuan an pawl thil phut pakuate chu ziakin, Prime Minister hnenah memorandum an thehlut dawn a, vawiin hian Lok Sabha speaker Om Birla pawh hmuh an tum tih a sawi. An pawl hian fair price shop kaltlanga buhfai, wheat leh chini pek chhuah sum an hlohte zangnadawmna pe turin an phut a, tel (edible oil) leh be lam chi pawh fair price shop kaltlanga pek chhuah tawh an phut bawk a ni. Hei bakah hian West Bengal state-in ration sem hna a kalpui dan, Weng Bengal Ration Model chu ram pumah hman an phut thu an sawi. An thil phut hi Parliament session neih mekah Trinamool Congress (TMC) MP Sougata Roy pawhin a sawichhuak tawh tih an tarlang bawk.