NDA Presidential nominee atan Bihar governor ruat

BJP kaihhruai National Democratic Alliance (NDA) sorkar chuan Bihar Governor, Ram Nath Kovind chu India president thlanna neih turah nominee atan an ruat.

BJP National president Amit Shah chuan presidential nominee atana Ram Nath Kovind ruat a nih thu hi nimin khan a puang. Thutlukna hi BJP Parliamentary board meeting neih hnuah puan chhuah a ni a, Kovind hian June 23 hian nomination paper a file ang. Hetih lai hian vice president tur hming erawh puan chhuah a la ni lo. Amit Shah chuan president chuh tur tihchhuah a nih hma hian Prime Minister Modi chuan Congress president Sonia Gandhi leh Prime Minister hlui Manmohan Singh-te pawh a rawn thu a sawi. Kovind hi Uttar Pradesh mi leh sa a ni a, kum 1994-2000 leh 2000-2006 chhung khan Rajya Sabha-ah MP a lo ni tawh a, amaha hi advocate a ni.

Kovind hi October 1, 1945 khan UP-a Kanpur Dehat-ah a piang a, B.Com a zawh hnuah Kanpur University aṭangin LLB a zo leh a ni. Amah hi Dalit leh hnam hnuai hnung zawk tana thawhhlawk tak a ni.