Sorkar laipuiin GJM nena inbiaka nei turin Mamata duh
West Bengal state aṭanga Gorkhaland state hran phut vanga Darjeeling-a nawrh huaihawtnaah buaina chhuak thar a awm lo a, hetih lai hian sorkar laipui chuan boruak ṭha tak a awm zel theih nan West Bengal Chief Minister Mamata Banerjee-i chu Gorkha nawrh huaihawt mekte inbiakpui dan ngaihtuah tura a duh thu a sawi.
Union Home Minister Rajnath Singh chuan, party leh a kaihhnawih mi pawimawh dangte chuan an inkara inhriatthiam lohna awmte chingfel a, boruak ṭha siam tura inbiakna an neih a ngai a ni, a ti.
Darjeeling-a state hran ngiata nawrh huaihawt Gorkha Janmukti Morch (GJM)-te hi police-te nen innawr buaiin, buaina chhuak vang hian GJM member pali an thi tawh a ni. India Reserve Batallion pakhat chu vih a ni a, sipai 35-in hliam an tuar bawk.
Singh hian Pathianni zing khan Banerjee-i hi a bia a, GJM thilphut chungchang pawh hi a zawt a ni. Banerjee chuan Bengal ṭhendarh hi a remti ngai dawn lo tih a sawi.
Nawrh huaihawt ṭanna hi West Bengal-a Trinamool Congress sorkarin school-a Bengali ṭawng zir vek tura a tih vang a ni. Hills area-a a tam zawk hian Nepali ṭawng an hmang a, hei vang hian sorkar thupek hi an duh lo a ni. Bengali ṭawng hmanga tura thupek siam an duh lohna an lantir hnuah, GJM hian state hran ngiatin nawrh an huaihawt zui a ni.
West Bengal-ah hian GJM hi BJP nen an thawkdun a, an thil phut an nawr chungchangah pawh state sorkar nen chauha inbiakna neih an duh lo a, sorkar laipui aiawh an tel an phut a ni.