Eptu pary-te’n President candidate tur ngaihtuah dawn

BJP kaihhruai NDA sorkar chuan President thlanna neih tura NDA candidate atan Dalit hruaitu, Bihar Govenror nilai Ram Nath Kovind an ruat a, eptu party hruaitute pawh Ningani hian President candidate chungchang ngaihtuahin an inhmu khawm dawn.

Eptute hian NDA president candidate hi an thlawp dawn nge, candidate hran an siam dawn tih an la sawichiang lo. Mahse NDA candidate khing tur hian Dalit hruaitu dang, Lok Sabha Speaker hlui Meira Kumar-i an thlang mai thei nia sawi a ni.

BJP-te chuan president candidate atana Dalit hnam a thlanchhuah hnuah, an candidate thlawplo chu Dalit dodaltu ang hialah an puh nghal. Candidate atana Dalit hnam an thlang hian hnam hnuaihnung leh rethei te hipna a neih belh pawh rin a ni a, Governor Kind hi President atana thlan a nih chuan, KR Narayanan-a hnua Dalit hnam zinga president ni thei leh hmasa ber a ni ang. Hetih lai hian Congress leh Left party-te chuan BJP chetdan hi na takin an sawisel.

Eptu hruaitu ṭhenkhat chuan NDA candidate lo dodal hi thil harsa tak tur niin an sawi. Dalit hruaitu Mayawati chuan Dalit a nih avangin candidate atana Nath Kovind ruat a ni chu ṭha a tih thu a sawi a, mahse eptu lam pawhin Dalit hruaitu dang an la ruat ve leh thei tho tih a sawi.

BJP thawhpui, TRS leh AIADMK-te chuan Prime Minister Narendra Modi-a’n president candidate atana a thlan chu an thlawp dawn tih an sawi a, TDP leh BJD pawhin thlawp an tum.

West Bengal Chief Minister Mamata Banerjee-i chuan NDA sorkarin candidate atana Bihar Governor a thlang chu mak an tih thu a sawi a, hemi rual hian Dalit hruaitu dang ṭha tak tak pawh an la awm a ni, a ti.

Bihar Chief Minister, JDU hruaitu Nitish Kumar chuan eptu hruaitu dangte a hmuh hunah a thutlukna chu a puang dawn tih a sawi ve bawk.

Prime Minister Narendra Modi chuan Governor Kovind chu President ropui tak a nih theih thu a sawi. Eptu hruaitu hrang hrangte pawh an candidate thlawp tur hian a be kual tawh a ni.