GST hman ṭan dawnah Parliament zanlai session nei dawn

Sorkar laipuiin chhiah lak dan thar a duan, Good and Services Tax (GST) chu July 1 aṭangin hman ṭan a ni dawn a, hman ṭan a nih dawn zan June 30-ah hemi pual bik hian Parliament zanlai session neih a ni dawn.

Parliament in hnih-ah sorkar laipui chuan June 30 zan dar 11 aṭanga zanlai pelh, zing dar 12.10 thleng special session neih a rawt a, he hunah hian President Pranab Mukherjee, Prime Minister Narendra Modi leh Finance Minister Arun Jaitley-te’n thu an sawi ang. Zanlai ah hian GST hmanṭan a nih chhin­chhiahna atan khuang pawh vuak thum a ni bawk.

Parliament Central Hall chu taxation sytem thar hawnna atan sorkar chuan a hmang dawn a ni.

GST Bill hi Congress kaihhruai UPA sorkar lai, Pranab Mukherjee-a Finance Minister a nih laia bul ṭan a ni. Central Hall-a taxation system thar hawnnah hian Prime Minister hlui Mohmohan Singh bakah HD Deve Gowda-te pawh chanvo pawimawh chang zingah telh an ni ang.

Taxation system thar hawnnaa hian state tin chief minister-te chu tel tura sawm a ni a, GST Council member-te pawh sawm an ni.