Darjeeling-ah internet service titawp

Gorkhaland state hran phuta Darjeeling-a Gorkha Janmukti Morcha (GJM)-te’n nawrh an huaihawt avangin ni hnih chhung internet service tihtawp a ni tawh a, khawpui chhungah hian security force-te duty tir an la ni reng bawk.

Gorkha Janmukti Morcha (GJM)-te’n West Bengal aṭanga state hran an phutna chu Chief Minister Mamata Banerjee chuan a remti dawn lo tih a sawi a, hei vang hian GJM-te hian CM lim an hal a ni.

GJM activist-te hian social media hmanga thu an thehdarh zel tur venna atan internet hi tihtawp a ni tih police-te chuan an sawi. GJM hian hma lak zel dan tur ngaihtuahin nimin khan all-party meeting an ko bawk.

CM Banerjee-i chuan Darjeeling chungchang ngaihtuah tur hian June 22-ah Siliguri-ah all party meeting a ko dawn a, he huna tel vek tur hian party hrang hrangte chu a hriattir a ni. CM chuan harsatna awmte chu tharum hmanga chinfel a nih theih loh thu leh, inbiakna hmang chauha chinfel chi a nih thu a sawi. Hemi rual hian Bengal chu englai mahin ṭhendarh a remti dawn lo tih a sawi bawk.

GJM chuan state sorkar nena inbiakan neih an duh loh thu an sawi a, mahse central-a rorellai BJP erawh inbiakna neihpui an hreh loh thu an sawi. Darjeeling-a kum 2014-a Lok Sabha inthlanpuiah khan BJP leh GJM hi an thawkdun a ni.