Darjeeling-ah tiam chin awm loa nawrh chhunzawm dawn

Darjeeling hills-a Gorkhaland state hran phuta nawrh huaihawt mek, Gorkha Janmukti Morch (GJM)-te chuan Thawhlehni khan all-party meeting an ko a, security force-te koh kir an nih hma chuan tiam chin awm loa nawrh chhunzawm zel an rel.

GJM hian June 8 aṭang khan Gorkhaland state pek phutin nawrh an huaihawt ṭan a, nawrh huaihawt chhung hian security force lam nen pawh an intibuai fo a ni. GJM chuan Gorkhaland Territorial Administration (GTA) tripartite accord aṭanga inhnuhdawh a rel bawk.

Nawrh huaihawt vanga tharum thawhnate a thlen avangin security force tam zawk dah luh an ni a, internet service pawh ni thum chhung tihtawh a ni tawh. Nawrh huaihawt vang hian dawr khar vek a nih avangin mipui nunphung pawh a khaihlak tawh hle.

Sikkim-a rorellai, Sikkim Democratic Front chuan Gorkhaland state hran phutna chu an thlawp thu an sawi a, Darjeeling-a nawrh huaihawt mekte chungah security force-te chet dan chu an dem thu an sawi bawk. Sikkim khawpui Gangtok-ah mi eng emaw zatin Darjeeling mipuite an thlawpna lantirin candle light march an huaihawt bawk.

GJM thupuangtu T Arjun chuan all party meeting an neih hnua chanchin thar lakhawmtute a kawmnaah, West Bengal sorkar leh sorkar laipui chu security force an tirhte ko kir vek tura an phut thu a sawi. Boruak muanawm a awm leh theihna tura mawhphurtu chu state sorkar a nih thu a sawi bawk. All-party meeting-ah hian political party hrang hrang bakah NGO-te an tel a ni. Vawiina Darjeeling chungchang ngaihtuah tura West Bengal sorkarin all party meeting a kohah tel loh an rel bawk a ni.