Covid leh Ukraine indona chhuanlamah hmang suh u - Eptute

Ram chhunga nitin mamawh thil man sang zel chungchangah BJP kaihhruai sorkar laipui chuan khawvel economy, Covid-19 hri leng leh Ukraine indona thleng mekte chhuanlamah hmang lo turin eptuten an ti a, thil man sang zel khuahkhirhna kawngah an hlawhchham tih chu pawm mai turin an ti.

Parliament monsoon session neih mekah eptu party-te hian ram chhunga thil man sang zel leh, GST rate tihsan chungchang chu House-ah nasa takin an aupui a, rorel mumal thei loin an awm phah fo a ni.

Hetih lai hian BJP chuan thil man sang zel chungchang hi eng mahin an thunun theih a ni loh laiin, prime minister Narendra Modi kaihhruai sorkar laipui erawh chuan a hlawhtlinna a lo dang thei a ni, an ti thung.

Nimina Rajya Sabha rorel inkhawmah thil man sang zel chungchang hi sawihoin, union finance minister Nirmala Sitharaman-i'n thu a sawi laiin Trinamool Congress (TMC) MP-te chu House aṭangin an chhuak. TMC chuan Finance Minister hian thil man sang zel chungchang chinfel dan tur ngaihtuahin, eptu party lamte thusawi lo hnial thlak ringawt a tum a ni, an ti.

Rajya Sabha-a sawihonaah hian CPI(M) MP Elamaram Kareem chuan kum 2014 aṭangin ram chhungah nitin mamawh thil man a sang chak hle a, tun hnaia sorkar laipuiin pre-packed food item-a GST a lak thar leh chuan miretheite phurrit a belhchhah bawk a ni, a ti. "Sorkar laipui hian mirethei ni loin, mi hausate aṭangin chhiah hi la tur an ni," tiin a sawi.

TMC MP Derek O'Brien pawhin pre-packed food item-a GST lam chu eptu party-te chuan an remtih ve loh thu a sawi bawk. "Hei hian hna neilote a nghawng na zual hle. Sorkar chu he harsatna thleng mek hi hrechiang hmasa phawt turin kan ngen. Harsatna ber a hriat si loh chuan engtinge a chinfel theih ang?" a ti.