Vawiinah Kovind-an nomination paper thehlut dawn

National Democratic Alliance (NDA) president candidate Ram Nath Kovind chuan July 17-a President thlanna neih tura chuh turin vawiin hian nomination paper a thehlut dawn a, Prime Minister Narendra Modi, BJP president Amit Shah leh hruaitu pawimawh dangten an ṭawiawm ang.

Kovind-a nomination paper thehluhnaah hian BJP chief minister ho leh an thawhpui dangte pawhin an telpui dawn nia sawi a ni.

BJP chuan Kovind-a nomination thehlut tur hi thawh lia kalpui turin a duang. A thawh khatnaah chuan Prime Minister Narendra Modi chu proposer niin Union Home Minister Rajnath Singh-an a telpui ang.

A thawh hnihnaah BJP president Amit Shah chu proposer a ni dawn a, Union Finance leh Defence Minister Arun Jaitley a tel ve ang. A thawh thumnaah proposer-ah Shiromani Akali Dal (SAD) hruaitu Parkash Singh Badal chu ṭangin, Union Urban Development Minister M Venkaiah Naidu a tel ve dawn a ni.

A thawh linaah Andhra Pradesh Cheif Minister N Chandrababu Naidu chu proposer a ni dawn a, External Affairs Minister Sushma Swaraj-ina telpui ang.

Bihar Governor hlui, Ram Nath Kovind hi NDA president candidate atana puan a nih hnuah Delhi-ah chhuk nghalin, Bihar Governor a nihna aṭang pawhin a bang tawh a ni. Nimin khan a nupui nen prime minister hlui Atal Behari Vajpayee pawh an hmu a, Nilaini khan BJP veteran LK Advani pawh a lo hmu tawh bawk.

July 17-a President thlanna neih tura chuh tumte tan June 28 thleng nomination paper thehluh theih a ni a, result hi vote thlak aṭanga ni thum hnuah puan a ni ang a, president thar hian July 25 ṭangin office a luah ṭan nghal ang.