Rajiv Gandhi-a thattuin tihhlum dil

Prime Minister hlui Rajiv Gandhi-a thah a nih chungchanga thiam loh chantir zinga pakhat, Robert Pious chuan Tamil Nadu sorkar leh DG Prisons hnenah ngenna thawnin, tihlum tawh mai turin a dil.

Robert Pious hian kum 27 chuang jail-ah tantir a nih tawh avangin dam chakna leh tumna pawh a nei tawh lo niin a sawi. “Kum 27 chuang jail-ah ka tang tawh a, sorkarin ka chunga a thil tum pawh ka hrethiam a, ka chhungte tumahin min tlawh ngai lo bawk a, hei vang hian dam chhan tur kan nei tawh lo a ni”, a ti.

Chennai-a Puzhal Central Prison-a tang mek, Robert Pious hi kum 1999-a thiam loh chantirtu judge zinga pakhat pawhin pawisawi lo a nih thu a sawi leh tawh a, mahse heti chung hian a la tang reng tho niin a sawi. Jail aṭang chuan an chhuahtir a ring tawh lo tih sawiin, hei vang hian zahngaihna lantira tihlum mai turin a ngen a ni.

Robert Pious hi Sri Lankan Tamil a ni a, LTTE commando team zinga mi nia puh a ni. Man anih hnuah police-te hnenah pawh Rajiv Gandhi thah a nih theihna tura ruahmantu zingah a tel thu a sawi a ni. Rajiv Gandhi thah thubuaiah hian mi pasarih chu thiam loh chantir a ni.