Darjeeling : Gurung-a biru, buaina la ziaawm lo

Darjeeling-a Gorkhaland state hran ngiata nawrh huaihawttu, Gorka Janmukti Morch (GJM) hotu Bimal Gurung chu a biru a, a awmna chin hriat a la ni lo.

Gurung hi kar hmasaa police-ten an office an dap hnu khan a biru a, he thil thleng vang hian tharum thawhna pawh a punlun phah hle. Police-te chuan Gurung hi hmuh ngei tumin theihtawp an chhuah mek tih an sawi a, mahse man a nih chuan buaina nasa zawk a chhuah an hlauhthawn thu an sawi.

Buaina chhuak vang hian internet tihtawp a ni a, hei hi a chhuina kawng­ah pawh harsatna a siam niin an sawi. GJM chuan a awmna hmun hi a sawn kual fo a, a awmna apiang­ah amah thlawptuten an hum tlat tih sawiin, man anih chuan buaina a chhuah nasat viau tur thu GJM hruaitu pakhat chuan a sawi. A bihruk hma hian video message pahnih a siam a, hetah hian a thisen far tawp thlenga Gorkhaland dinna tura a beih tur thu sawiin, he video hi an thehdarh kual reng a ni.