Meghalaya-a Federation of Khasi-Jaintia and Garo People (FKJGP)-te chuan state chief minister Mukul Sangma-a’n an thil phut chungchangah inbiakna neih a duh lo a nih chuan lungawi lohna lantira nawrh huaihawt leh an tum thu an sawi. Meghalaya-ah hian pawl hrang hrangte chuan Ri Bhoi district-a Tetelia-Byrnihat railway project kalpui mek chu tihtawp phutin sorkar an kar mek a ni. 
FKJGP president Wellbirth Rani chuan chief minister chu an thil phut chungchangah inbiakna neihpui an duh thu sawiin, inbiakna hi neih a nih loh chuan nasa zawka nawrh huaihawt leh an tum thu a sawi. FKJGP-te hian Home Minister H D R Lyngdoh chu inbikna an lo neihpui tawh a, chief minister chu inbikna neihpui leh an duh a ni. Home minister chu an thil phut chinfel a nih thuai theih nana chak taka hma la tura an phut thu an sawi. Hetihlai hian chief minister Sangma chuan railway project dodal zawnga nawrh huaihawt leh tharum thawhna a thlen chhung chuan state sorkar chuan eng pawl mah inbikna a neihpui loh tur thu a lo sawi tawh a ni. 
Federation of Khasi-Jaintia and Garo People (FKJGP) bakah hian, Khasi Students Union (KSU), Hynniewtrep National Youth Front (HNYF), Ri Bhoi Youth Federation (RBYF) leh Confederation of Ri Bhoi People (CoRP)-te chuan Ri Bhoi district-a Tetelia-Byrnihat railway project kalpui mek chu nasa takin an dodal a ni. Pawl hrang hrangte chuan he project hi Inner Line Permit (ILP) neilo te tana kawng hawnna tur niin an ngai a, ILP nei lo mi tam takin awlsam zawkin an state an rawn lut thei dawn niin an sawi. Khasi Students Union (KSU)-te chuan Tetelia-Byrnihat railway project duh lohna lantir hian nawrh an lo huaihawt tawh a, nawrh huaihawt zinga mi 10-te chu man an ni. 
Hetih lai hian Union Minister of State for Railways Rajen Gohain chuan pawl hrang hrang ten Railway Project tihtawp phuta lungawi lohna an lantir chu pawi a tih thu sawiin, project chu tihtawp mai theih a ni lo tih a sawi. Rajen Gohain chuan Ri-Bhoi district-a project kalpui mek chu tihtawp mai theih a ni lo a, hna pawh thawh chhunzawm zel a ni ang. Sorkar laipui pawhin dodalna hi a pawm lo a, hna hi thawhchhunzawm zel a ni ang, a ti. Hetih rual hian pawl hrang hrang te chuan nawrh hi an huaihawt leh dawn tih sawiin, project hi tihtawp a nih hma loh chuan hma an la zel dawn tih a sawi. He project hi Meghalaya mipuite chimral theihna a nih avangin an do zel dawn tih an sawi a, Inner Line Permit (ILP) chu khauh zawka ken kawh an phut thu an sawi.